Tradizioa bertze urte batez bizirik mantendu ahal izan dute, inguruko usazale eta boluntario talde eder baten lanari esker, «bakoitzak ahal duen neurrian, esfortzu handia egin baitute, 50 egunez tradizio xahar hau bizirik mantentzen jarraitzeko».
200 lagun bisita gidatuetan
Bisita gidatuei dagokionez, ia 200 lagun inguru animatu dira eta aurtengoan ia laurdenak izan du usazaleak lanean ikusteko aukera eta zortea. Bisitari gehienak Nafarroa eta Euskadikoak izan dira. Eskolako haurrak ere hurbildu dira aurten, bi urtetik behin egiten duten bezala eta bisita egin ondotik, paletak botatzeko aukera ere izan zuten.
Erakusketa Pello Apezetxea kultur etxean
Berrikuntza bezala, pasa den igandean usategiei buruzko erakusketa aurkeztu zuten usazaleek Etxalarko Pello Apezetxea Kultur etxean, usategiak herritarrei hurbiltzeko helburuarekin. Bertan, Josetxo Apeztegia, Fidel Perrot eta Aimar Iparragirreren argazkiez gain, ehizarako tresnak, usategietako maketa, Pello Apezetxearen liburuak, trepa eta sare guztien informazioa eta ordu erdiro, usategietako aitzinako eta oraingo bideoak ikusteko aukera dago. Erakusketa, 16:00etatik 19:00etara egonen da irekia aste tartez eta 17:00etatik 19:00etara asteburuetan, abenduaren 10a bitartean.
Pirinioetako usategiak Behorlegin elkartuko dira larunbatean
Bertzalde, datorren larunbatean, abenduaren 2an, urteroko Pirinioetako usategietako usazaleen besta ospatuko dute (9 usategi dira martxan direnak) Nafarroa Behereko Behorlegi herrian eta bertan boneta handi bat ematen zaio denen artean uso gehien hartu dituenari eta boneta ttiki bat guttien hartu duenari. Etxalarko usazaleen aurreikuspenen arabera, Etxalar, laugarren postuan gelditua da, baina larunbatean jakinen dute ziur.