Ikasturte honetatik aurrera euskara ikastea debalde izanen da Bortzirietan

Bortzirietako Mankomunitateak, bere gain hartuko du euskara ikasteko eskubide hori he­rritar guztien eskura egoteko ardura, betiere, ikasleek hainbat baldin­tza betetzen badituzte. Hala, gutxieneko bertaratze eta aprobetxamendu maila egiaz­­tatu beharko dute, eta euskaltegia bera arduratuko da horren jarraipena egiteaz.
Bortzirietako Euskara Mankomunitatearen ustez «euskararen irakaskuntza errazteko babes instituzional eta konpromiso sendo hau eredu izaten ahal da Nafa­rroako bertze entitate ba­tzuek antzeko neurriak har ditzaten». Bidenabar, helduaroan euskara debalde ikasteko eskubidea ziurtatuta arlo honetan gaztelaniarekiko desabantaila gaindi­tzeko bidean egon litezkeela uste dute. ­Ho­rrez gain, pauso hau emanda, bertze he­rrial­de ba­tzuetan abian diren eredu aitzindari eta arrakastatsuekin bat eginen dute Bortzirietan. Erra­terako, badira urteak Katalunian katalana ikastea doakoa dela.

Izen-ematea
 Interesa dutenek euskaltegira joan beharko dute lehenbizi matrikula egitera. Ikastaroaren finantzaketari buruz informatzeko eta eskaera egiteko berriz, Euskara Mankomunitatera jo beharko dute  (948 634 125 /euskara@bor­tziriak.eus).

«2.000 gora lagun euskara ikasteko beharrean»
Bortzirietako Euskara Mankomunitateak  datua ere azaleratu du «eskura ditugun azkeneko datuek  erakusten dute Bortzirietan badirela ia-euskaldun eta erdaldunen artean 2.000tik gora lagun, hortaz, euskara ikasteko beharra dutenen kopurua ez da gutxies­tekoa».