Bi kamioien arteko istripua izan da ilbeltzaren 20an, astearte goizaldeko 5:19an Bera parean, N-121-A errepidean. Istripuaren eraginez errepidea moztua egon da bi orduz eta Foruzaingoak Iruña alderako bidea irekia utzi du ibilgailuentzat eta Irun alderakoan Berako zeharbidetik bideratu dute. Gaurgero, bi noranzkoetan zabalik dago errepidea.
Itxura batean, kamioietako bat bidetik atera da eta bertzea errepidean gelditu da elkarren kontra jo ondotik. Gidarietako bat, 64 urteko poloniarra Irungo Ospitalera eramen dute buruan kolpe bat eta odola zuelako eta bertzea Berako Osasun Zentroan artatu dute, saihetsean kolpea zuela.
Oronozko parkeko bonberoek eta Berako boluntarioek kamioien depositoetako gasoila bildu dute eta bidea garbitu.
Lehendik ere hainbat istripu larri gertatuak dira N-121-A errepidean Berarako irteera inguru horretan.