Otsailaren 25ean izan zuten batzarra Baratzondo Elkarteko bazkideek. Ez zen, egia erran, batzar jendetsua izan. Junta osatzen duten 6 kideetaz gain bertze 6 lagun bertzerik ez omen ziren agertu. Ez da batere berri ona, elkartearen osasunerako behinik behin. Kontua da joan zirenek urteko ekintzei eta kontuei egin zietela errepasoa bileraren hasieran. Junta berria ere aukeratu zuten: Bautista Migelena izanen da lehendakari berria, Esperanza Elzaurdia idazkaria, Josetxo Arburuak jarraituko du lehendakariorde gisera, Amalia Seinek ere bertze urte bat eginen du diruzain lanetan eta Simeon Iguzkiagirre eta Carmen Hita izanen dira bokal berriak. Jakin dugunez, elkartean sukalde ttiki bat egiteko asmotan dabiltza. Ea erabaki horrekin bazkideak pixka bat gehiago animatzen diren.