Pilotak ere ofizialtasunaren bidea jorratzeari ekin zion Eguberrietan. Euskal selekzioaren eta Mexikoren arteko lagunarteko lau jaialdi antolatu zituen Euskadiko Euskal Pilota Federazioak, horietako bat urtarrilaren 2an egin zena Berako Eztegara pilotalekuan. 400 lagun bildu ziren eta giro ederra izan zen frontoian. Partidak baino lehen aurreskua dantzatu zuten Gure Txokoako Mikel Esnaola eta Izaskun Agara dantzariek eta antolakuntzak txapela jarri zien pilotariei.
Emakumezkoen paleta goma partidan, euskal selekzioko Amaia Etxaleku eta Maite Ruiz de Larramendik 25-12 irabazi zieten Mexikoko Rosa Flores eta Paulina Castillori eta gizonezkoen eskuz binakako partidan, euskal selekzioko Ander Errandonea eta Iñigo Martinez beratarrek 22-13 irabazi zieten Mexikoko Medina eta Morales-i.