Betidanik mozorrotu izan da «duela urte dezente txarangarekin ateratzen nintzen, gero haurrekin eta haurrak koxkortu zirenean ohiturari eutsi nion». Eta jakin zuen ez zela ohitura horri zuen bakarra «duela hamabi bat urte kuadrilla desberdinetakoak elkartu ginen, mozorrotzea gustuko dugun jendea, eta The Carnaval Show taldea sortu genuen».
Hilabete bat lehenago hasten dira prestaketa lanetan «taldera ideiak botatzen joan eta erabakia hartzen dugu». Osaigarik garrantzitsuena «irudimena» dela dio eta «egiteko errazak eta oso garestiak ez diren gaiak» hartzen dituztela normalean zenbaitetan gehixeago konplikatu izan garen arren». Egin dituzten mozorro guztiak ditu gustuko «batzuekin gehiago identifikatzen zara, errazago sartzen zara paperean eta joku gehiago ematen dute baina mozorro guztiekin ongi pasatzen dugu». Pasa den urtean adibidez, «jubilatu taldea irudikatu genuen hondartzan eta ederki pasa genuen». Kadizko txirigotak, igeriketa sinkronizatua, aretoko dantzak... dira egindako bertze mozorro batzuk eta «guztietan musikak garrantzia handia izan du. Musikazale aunitz gaude taldean eta hori nabari da».
Garai bateko inauteriak eta egungoak alderatzeko ere eskatu diogu eta bere ustez «orain gaiak ugariagoak dira, kolore eta aukera gehiago daude. Lehen helburua jendeak ez ezagutzea zen, orain berriz, emaitza originala eta ikusgarria lortzea».
Bukatzeko gonbidapena ere luzatu du «herri guztia elkarrekin ibiltzen gara eta giro bikaina izaten dugu. Horregatik, denoi parte-hartzera gonbidatu nahi zaituztet».
Gazte edo ez hain gazte... inauterietarako duten gogoa ikusita, ez dago jakiterik nortzuk izanen diren erretiratzen azkenak.