«Emandako pausu honekin bertako produktuak kontsumitzeak duen garrantzia azpimarratu nahi izan dugu eta horrela zuen kontzientzietan eragin eta baztandarron etxeetan bertako produktuek geroz eta presentzia gehiago izan dezaten, izan ere, horrela lortuko baitugu Baztan eta bertako paisaia bizirik mantentzea», aipatu zuten.
Aurtengoan Baztandarren Biltzarrako menua hau izanen da: «piperrada (bertako lan-talde batek egina), Patata tortile (garai bateko Lekauzko eskolakoa oroituz), aratxe erria litxuekin (aratxiak bertako abeltzain gazteak diren Andoni Barrenetxe berroetarrari, Pello Sarratea almandoztarrari eta Jon Dufurrena erratzuarrari hartuak eta litxue berriz Iruritako Urrutia anaiena). Ondotik Euskal pastela (urtero aldatzen dugu baina bertako gozotegietakoa izaten da, Malkorra eta Arkupekoa hain zuzen ere), Izozkia (Jauregia esnekietan ekoitzia), kafea eta pattarra. Ilunabarrean karpan egiten diren bokadiloetarako erabiliko duten gasna Etxelekua gasnategikoa izanen da».
Txartelak uztailaren 13an
Aurten bazkariko txartelek 23 euro balioko dute, «egindako apostuak merexi baitu». Txartelen salmenta uztailaren 13an, asteazkenean, izanen da Baztandarren Biltzarrako egoitzan goizeko 10etatik aitzinera.
Bazkariarekin lotuta, baztandar gaztetxoei deialdi bat zabaldu nahi diete: «Neurri haundi batean beraiek dira bazkari hau posible izatearen zutabe eta beraien laguntza eske gatoz aurtengoan ere. Gure bestan zerbitzari gisa aritzera animatzen ditugu, bestan eta lanean, denon artean Baztandarren Biltzarra posible izan dadin».
Tonbola
Urtero bezala Baztandarren Biltzarrak tonbola jarri du martxan eta gaur gero bertako zenbait komertzioetan boletoak erosteko aukera bada. Boleto hauetan baztandar aunitzek emandako sariak aurkituko dituzue. Sari zuzenik ez duten boletoak 1.000 euroko zozketa batean parte hartuko dute eta aurtengo berrikuntza gisa 1.000 euro horiek tonbolan parte hartzen duten komertzioetan gastatzeko izanen dira.
Aurten ere kamisetak egin dituzte. Elizondoko Intza ostatuan egonen dira salgai edo bertzenaz, larunbatetan 11etatik 13:00etara eta besta aitzineko astean arratsaldero, egoitzan ere izanen dira eskuragarri.
Elizondoko Lanbide Eskola omendua 50. urteurrenean
Elizondoko Lanbide Eskolak 50 urte betetzen dituenez, urte hauek guztietan egindako lana omentzea ezinbertzekoa iruditu zaio Baztandarren Biltzarrari eta, beraz, hauek izanen dira aurtengo desfilea irekitzearen arduradun. «Zorionak guzti guztiei, irakasle, langile eta baita ikasleei ere, zuek ereindako haziek fruitu ugari eman baitituzte».
Baztandarren Biltzarrak bereziki nabarmendu nahi du ez duela inolako eraso sexistarik onartuko. «Denendako besta izatea nahi dugu, elkar errespetatuz denok ongi pasatzeko eta bestaz gozatzeko. Hortaz, argi utzi nahi dugu edozein salaketen aitzinean eraso sexisten protokoloa martxan jarriko dugula».
Egitaraua
Baztanen eskuara barra-barra leloarekin, aurten 53. aldiz baztandarren besta haundia ospatuko da uztailaren 17an. Aurten ere egun osoko besta izanen da eta hori horrela izateko egitarau osatua prestatu du Baztandarren Biltzarra elkarteak.
Uztailaren 17ko egun handiari dagokionez, 10:00etatik aitzinera, goiz osoan artisauen erakusketa egonen da ikusgai Pedro Axular karrikan. 11:00etan herri bakoitzak prestatutako orga apainduen desfilea hasiko da. 14:00etan Mutildantzak izanen dira Elizondoko plazan eta ondotik herri bazkaria izanen da Merkatuko zelaian. Bazkalondoko animazioan, Baztango ioiak edo eztei-soinuak, Baztandarren Biltzarraren mezua, sari banaketa, animazioa eta dantzak izanen dituzte Merkatuko Plazan. 18:00etan hasita Trikidantz taldeak dantzaldia eskainiko du Laxoako plazan eta 20:00etan Oharkabe taldeak hartuko dio lekukoa. 01:00etatik aitzinera, Tirry&Tery Djak ariko dira Laxoako plazako ostatuan.
