Oronoz-Mugairiko eskola publikoko ikasleak normaltasunez itzuli ziren ikastetxera urtarrilaren 9an, Eguberrietako oporren ondotik. Hain zuzen, opor hauek aprobetxatu dira gimnasioan izandako sutearen ondorioz gertatutako kalteak moldatzeko. Jakina denez, abuztuko bestetan erre zen gimnasioa, itxura batean nahita eragindako sute baten ondorioz. Koltxonetak eta PVC edo poliuretanoa bezalako gai kutsakorrak erre ziren. Horregatik, guraso eta irakasleak kezkatuak zeuden, ikasle eta irakasleek kutsadura hori arnas zezaketeelakoan. Osasun Publikoko Institutuari txostena igorri eta honek zenbait lan egitea aholkatu zuen.
Obrak sarreran eta gimnasioan
Aholku horiei segituz, obrak eskolaren sarreran eta gimnasioan egin dira gehien bat. Gimnasiotik sartzen ziren usaiak ahal bezainbat murrizteko zuloak itxi dira, baita sarreratik gimnasioara ematen zuen leiho borobila ere. Lehendik garbitu ziren zola, pareta eta sabaiak berriz ere sakonki garbitu dira, pikatuz eta margotuz, eta hondatuen zeuden altzariak bota behar izan dituzte. Klaseak ez eteteko, Eguberrietako oporrak aprobetxatu dira lan hauek egiteko.
Udalak eraikina ordainduko du, Hezkuntza Departamentuak edukia
Baztango Udalak bere gain hartu du eraikinean egin beharreko lanak eta Nafarroako Gobernuko Hezkuntza Departamentuak ordainduko ditu edukiak berritzeko lanak. Hain zuzen ere, Departamentu honek emana zuen moldaketa lanak egiteko baimena eta Eguberrien ondotik eskolak guttieneko baldintzak beteko ez balitu, ikasleak Elizondoko eskolara gan beharko zirela ere jakinarazi zuen.