Ilbeltzaren 29an, ostiralean 22:00etan bertso-saioa eskainiko dute Atekabeltz gaztetxean Leitzako Atekaberts (Ander Fuentes Itturri, Joanes Ilarregi eta Xabat Illarregi) eta Barañaingo Barañetak taldeek. Migel Mari Elosegi ‘Luze’ izanen da aurkezlea.
Ilbeltzaren 31n, igandean, bi saio izanen dituzte Lesakan. 12:00etan Arranon eginen den bertso-saioan Lesakako Unibertsolariak (Josu Sanjurjo, Jose Juan Zubieta Etxabe, Jon Silveira eta Iban Garro) eta Altsasuko Bota lasai (Aitziber Grados, Idoia Granizo, Ekain Alegre eta Joxema Leiza) izanen dira aurrez aurre. Garazi Condek eta Ainara Etxabidek aurkeztuko dute saioa.
Igandean 15:30ean Arranon bertan eginen den saioan Lesakako Tantirubertso (Eneko Fernandez, Ioar Tainta, Maddalen Lopez eta Iñigo Olaetxea) eta Leitzako Atekaberts (Ander Fuentes Itturri eta Joanes eta Xabat Illarregi anaiak) ariko dira. Maialen Belarra izanen da aurkezlea.
Lesakako bi saioen artean bazkaria eginen dute Arranon. Saioaren sarrera 3 eurokoa da eta bazkaria eta saioarena 10 eurokoa. Izen emateko Bortzirietako bertso eskolarekin harremanean jarri behar da: bortzibertso@gmail.com
Etxetik kanpo
Eskualdeko taldeek etxetik kanpo ere jokatu beharko dute asteburu honetan. Ortziral aratsaldean Iruñeko Zaldiko Maldikon ariko da Iluminatiums taldea (Amaia Elizagoien, Iker Gorosterrazu eta Alazne Untxalo) Obario Maldikoak taldearekin. Leku berean, igande arratsaldeko bertso-merenduan ariko dira Berako Larungo Antenak (Julen Zelaieta, Patxi Castillo, Aitor Elexpuru eta Jokin Pinatxo) eta Iruñeko Mirristi Drimtim.