Igandean Donezteben jokatutako partidei dagokienez, galduz hasi ziren Doneztebekoak. Kadete mailan, Enaitz Telletxeak eta Gaizka Agirrek 15-22 galdu zuten Markinako Aimar Ibarloza eta Iosu Agirremalloaren kontra. Hasieran berdindua joan zen partida, baina 8-18 aitzinetik jarri ziren bizkaitarrak. 15-19ra hurbildu ziren etxekoak, baina ez zen bueltarik izan.
Jubeniletan, aldiz, Doneztebeko Iker Salaberria eta Jon Mariezkurrenak 22-3 irabazi zieten Markinako Jon Beeikua eta Ander Malexetxeberriari. Markagailuak erakusten duena baino lan gehiago egin behar izan zuten Doneztebeko ordezkariek.
Senior mailan, azkenik, Joanes Bakaikoak eta Jon Gorritik 22-13 irabazi zieten Markinako Kepa Albizu eta Mikel Urizarri. Hasiera berdinduaren ondotik, 7-11 eta 8-12 aitzinetik izan ziren bizkaitarrak, baina hameka tantu segidan egin zuten etxekoek (19-12). Bertze tantu bat lortu zuten markinarrek, baina azkenean garaipen garbia izan zen Doneztebekoentzat.
