Elizondoko Antxitoneak Onenak Trinkete Txapelketa antolatu du bertze behin, eta ortziralean eta larunbatean jokatuko dituzte finalerdiak eta finala. Finalerdietan sarrera doan izanen da, baina larunbateko azken partidetarako 5 euroko sarrera kobratuko da eta Xauli elkartera bideratuko dute bildutakoa.
Lau bikote lehiatuko dira ortziraleko finalerdietan, 18:30ean hasita. Iñaki Iantzi eta Iñaki Urrutia, Ramuntxo Amestoiren eta Arnaud Bergeroten kontra ariko dira eta ondotik, bigarren finalerdian, Mattin Legarrea eta Axier Gamio, Joseba Arizmendiren eta Mikel Argarateren kontra.
Finalak larunbat goizean jokatuko dituzte. 11:30ean hasita hirugarren eta laugarren postuak erabakiko duen partida jokatuko dute eta gero, finalistek txapela izanen dute jokoan. Larunbateko sarrerak bortz euro balioko ditu, eta bildutako dirua Xauli elkarteari emanen diote.