Nafarroan bizi diren 50 eta 69 urte bitarteko gizonezko eta emakumezko asintomatiko guztiei zuzendua da. Martxoan Baztan aldeko 2.334 laguni bidali zioten programan parte hartzeko gonbitea eta horrekin batera, proba egiteko behar den materiala ere bai. Apirilaren 19tik maiatzaren 3ra Bortzirietako 2.347 lagunei bidali zieten, eta maiatzaren 10etik 17ra Malerrekako 1.522 lagunek hartuko dute. Proba hori norberak bere etxean egiten ahal du eta ondotik Osasun Etxean utzi. Herritar horiek bi urtetik behin test hau egiteko aukera izanen dute, kaketan ikusten ez den odolik ote den jakiteko, horrek tumore honen arriskuaz ohartarazten ahal baitu. Eta sendatzea errazagoa da garaiz detektatuta: goiz diagnostikatzen denean, %90a sendatzen da. Aurreratutako faseetan detektatuta, aldiz, biziraupena %50era murrizten da.