Merkatari ttikiak indartzeko helburuarekin, formazio ikastaroak eginen dituzte eskualdeko merkatariek udazken honetan. 60 autonomo eta langile ariko dira irailean hasi eta azaroan bukatuko diren ikastaroetan.
Iraileko hirugarren astean, Donezteben bezeroarenganako arreta hobetzeko teknikak landuko dituzte. Urriaren 18tik 29ra, berriz, komertzioa kudeatzeko informatika ikastaroa eskainiko da Elizondon. 20 ordukoa izanen da.
Azaroan, erakusleihoaren inguruan bertze ikastaro bat eskainiko da Lesakan. 20 orduko saioa izanen da eta azaroaren 2tik 15ra emanen da. Beran, azkenik, paketeak egin eta biltzeaz ariko dira, azaroaren 16tik 22ra eginen den 10 orduko ikastaroan.
Izen-ematea
Elizondo, Lesaka eta Berako ikastaroetan parte hartzeko oraindik badago aukera. Sektoreko langileek eta langabeek eman dezakete izena eta Nafarroako Merkatarien Federaziora deituz edo idatziz egin behar da: 948 23 99 08 edo formacion@comercionavarra.com.
Horrez gain, udaberrian ere ikastaro gehiago eginen direla iragarri dute Merkatarien Federaziotik. Bera, Elizondo eta Donezteben izanen dira.