Euskal Herriko Mugimendu Feministak, indarkeria matxistaren kontra, apirilaren 9an manifestazioa deitu du Gasteizen, "11 eraso 12 erantzun, Feministok Prest. Vuestras violencias tendrán respuesta" lelopean. Mobilizazio honek 3 helburu ditu: alde batetik, eraso matxistak salatzea, bestetik, azkenaldian ematen ari den mugimendu feministaren kriminalizazioa salatzea eta azkenik, bortizkeria zer den bere aurpegi anitzak ezagutu eta nola identifikatu tratatuko dituen ausnarketa eta eztabaida soziala sustatzea.
Gaur egun beharrezkoa eta ezinbestekoa deritzogu bortizkeriatzat zer ulertzen dugun birplanteatzea, bere konplexutasun guztiak eta bere forma anitzak ulertzeko markoa sortuz. Bortizkeria matxistak ez dira kolpeak eta hiletak soilik; arazo estrukturala eta sistema batean oinarritua da. Emakumeok beldurrean hezten gaituzte eta gure gorputza ahula den bitartean gizonena erasokorra dela sinistarazi nahi digute. Bortizkeria matxista ez da bat eta bakarra, gure jendarteak eraikitako egitura sendoa baizik, eta feminismoak, egoera hori agerian uzteko eta berari aurre egiteko erantzukizuna dauka.
Agintariak genero bortizkeriagatik oso arduratuak agertzen diren bitartean, errealitatea oso bestelako da: berdintasunaren arloan murrizketak ematen dira aurrekontuetan, sentsibilizazioan, bortizkeria matxista ekiditeko dauden baliabideak koordinatzen instituzioetan lanean dihardutenak gutxietsiz. Faminizidioa ez da kasualitate hutsa, arazoa ez da gizon batzuk burua galtzea. Inolaz ere ez dira kasu isolatuak. feminizidioak, generoen instituzionalismoaren bitartez gure jendartearen erdigunean daude.
Harreman bortitzak, naturalak bailitzan lehenesten diztuzte; maitasuna, jabetza, jeloskortasun eta kontrol moduan. Hauek normalizatzeaz gain beste harreman ereduak ikustezin bihurtzen dituzte. Hau dela eta, arau horri ihes egiten dioten gorputzek eta harremanek bortizkeria matxista jasaten dute. Lesbianen kontrako erasoak, nerabe transexualek beren buruaz beste egitea eta aniztasun funtzionala duten pertsonekiko erasoak ere bortizkeria matxista dira.
Gaua eta jaiak bortizkeriarako espazioak dira. Gaua, alkohola eta permisibitatea aitzaki hartuta emakumeon kontrako erasoak areagotu egiten dira. Batzuentzat jaiak ondo pasatzeko espazioak diren bitartean, beste batzuentzat erasoak, bazterkeria eta beldurra sufritzeko espazioak dira.
Ekonomia kapitalistak zerbitzu sozialak murrizten ditu. Honek eragin nabarmen handiagoa dauka emakumeekiko. Prestigiorik gabeko lanak egitera eta zaintza lanetara bultzatzen gaitu. Emakume etorkinek, esplotazio eta isolamendu egoerei egin behar diete aurre, gure jendartearen herentzia arrazista eta kolonialista beraien gain erortzen den bitartean. Egun, gainera, eraso sexistak neurri arrazistak justifikatzeko eta zabaltzeko erabiltzen dira, arazoaren arrazoia guztiz manipulatuz.
Ez gara ez biktimak, ezta pertsona pasiboak ere. Gure bizitzaren protagonistak gara. Gure errealitatearen transformazio sozialean eragin zuzena duen subjektu politikoak gara. Arazoaren muinari heltzeko ordua da, konpromezuak hartzeko ordua, bortizkeria matxistak ekiditu eta emakumeok menpekotasun espazioan ezartzen gaituen sistema eraldatzeko garaia. Argi daukagu zeintzuk diren honen jatorriak eta berauei aurre egiteko prest gaude.
Euskal Herriko mugimendu feminista, Goldatz Berako Talde Feminista barne erasoei aurre egiteko prest dago eta apirilaren 9an hau guztia plazaratzera joango gara Gasteizera. Zuei ere kaleak betetzeko gonbidapena luzatzen dizuegu, gure aliantzak erakusteko eta eraso bakoitzaren aurrean egongo garela altu eta ozen ohiukatzeko prest gaude: 11ERASO 12 ERANTZUN, FEMINISTOK PREST!!!
(Feministok Prest kanpainatik hartutako testua)