Juan Losa UPNko zinegotziaren aurkako salaketa paratu du Udalak Foru Poliziaren aitzinean, herriko eraikin batean baimendutako horma-irudia margo xuriz estali duelakoz. Udaletik gogoratu dutenez, «horma-irudi hori duela urte batzuk margotu zen Udalaren baimenarekin eta bertan ez ziren aipatzen ez presoak ez ETA erakundea ere. Euskal Herriko maparekin batera Euskal Herria aitortu, errespetatu zen UPNko zinegotziak ezabatu duen horma-irudiaren leloa». Gaineratu dutenez, «lehendik ere, zinegotziak errana zuen behin baino gehiagotan halakorik egiteko asmoa zuela baina alkateak aldioro adierazi zion ez zuela ezabatzeko baimenik, ez eskumenik». Udalak «hagitz larritzat» jo du halakorik egitea, «intolerantea izateaz gain, zinegotzia izanik, Udalaren erabaki baten kontra eragiten duelakoz». Hala, salaketa publikoa egitea eta bere udal ordezkariaren aitzinean erantzukizunez jokatzea eskatu dio Udalak UPNri.
Berako UPNk alkatearen eta bere taldearen pasibitatea salatu izan du prentsan, eta horren inguruan zera adierazi dute Udaletik: «agintaldi honetan izan diren pintadak aldioro garbitu dira eta orain ere antolatua zegoen kanpo santukoaren garbiketa». Udalean, agintaldi osoan, «pasibitatea agertu duen bakarra Losa zinegotzia bera» izan dela dio Udalak, «are gehiago azkeneko hilabeteetan, dagozkion ba-tzordeetara ez delako ia inoiz agertzen, ez udalbatzarretara ere». Berak bilatzen duen bakarra «nabarmentzea» dela uste du Udalak, eta «bere asmoa ez da herriaren alde egitea, bere kezka nagusia prentsan agertzea da, kosta ahala kosta, horretarako ikur eta sinboloen kontrako gerra pizten saiatuz, etengabe».
Bilduk ere zinegotziaren «jarrera onartezina» salatu du prentsa-ohar bidez eta UPNk Beran duen lan egiteko modua «gezurra, mehatxua eta errespetu falta» direla uste du.