Aroztegia Jauregiko proiektua tarteko, udal planean egindako aldaketaren txosteneko tramitazioei buruz galdetu dio NaBaik alkatetzari. Udal planaren aldaketa onartu zenetik, egin denaz errepasoa egin du NaBaik. Eta honi bertze ohar batekin erantzun dio Aroztegia eta gero zer? plataformak.
NaBaik gogoratu duenez, 2010ean onartu zen Aroztegia Jauregiaren inguruan udal planaren aldaketa egitea. 2011ko maiatzaren 2an, Konpentsazio Batzordearen estatutuen hasierako onarpena argitaratu zen NAO Nafarroako Aldizkari Ofizialean, Tokiko Udal Gobernu Batzordeak martxoaren 22an hasierako onarpena emandakoan. NaBairen arabera, «Udalaren behin betiko onarpena emateko legezko epea pasatu» egin zen, eta promotoreak berak bultzatuta, irailaren 30ean udal planean egindako aldaketaren ondoriozko Konpentsazio Batzordearen estatutuen behin betiko onarpena argitaratu zen NAOn.
NaBaik oharrean dioenez, «2011ko azaroaren 21ean Konpentsazio Batzordea eratu zen Elizondoko notariotzan, eta Udalaren aldetik ez zen ordezkaririk joan deialdi horretara».
Hori baino lehen, 2011ko abuztuan Aroztegia Jauregiko promotoreak udal planaren aldaketaren inguruko plan partziala udal erregistroan aurkeztu zuela dio NaBaik, Udalari hasierako onarpena eskatuz. «Azaroaren 18an plan partzial horren hasierako onarpena Aldizkari Ofizialean argitaratu zen. Berriro ere, promotoreak egin zuen argitaratzeko eskaera, legezko epean Udalak ez zuelako hasierako onarpenaren ebazpenik eman».
Hala, NaBaik hori guztia argitzeko eskatu dio alkatetzari: Konpentsazio Batzordea eratzeko bilerara zergatik ez zen joan eta Konpentsazio Batzordearen estatutuak behin betiko onartzeko eta plan partzialari hasierako onarpena emateko legezko epeetan «zergatik ez duen deus erran» azaltzeko erranez. «Administrazioaren isiltasun hori espediente honekin bakarrik edo gehiagotan gertatu ote den argitzeko» ere galdegin du.
Aroztegia eta gero zer?-en oharra
Aroztegia eta gero zer? taldeak NaBaik Aroztegiko egitasmo «espekulatiboan» duen interesa bertze behin salatu du. Horren aitzinean, «Lekarozko herria herri-galdeketan egitasmo horren kontra agertu zela» oroitarazi du. Eta gaineratu duenez, «NaBai alkatetzan zegoelarik, herritarren iritziari kasurik egin gabe, nahiago izan zuen iruzur kasuetan nahasiriko sustatzaileekin bat egin eta proiektua gauzatzeko baimenak eman».
Promotoreen artean, «iruzurgileez gain, Caixa Galicia dagoela» dio Aroztegia eta gero zer? taldeak, «bere inbertsio inmobiliarioengatik katakrak egin hurren dagoen aurrezki kutxa». Taldearentzat bistakoa da Aroztegian zer egin nahi duten: «euren interes hutserako proiektu espekulatzailea». Bere irudiko, espekulatzailea da «Baztanen dagoen lurzoru urbanizagarri guztiarekin 40 hektarea gehiago urbanizagarri kalifikatzea eta Baztango bizitzen %38 hutsik edo ia erabili gabe egonik 252 bizitzako proiektu berria baimentzea». Proiektua egitera, Lekarozen 756 biztanleko auzo berria eginen luketeela gogoratu du, «eta horrek Baztango egitura guztia deseginen lukeela».
Hori guztia baimendu edo baimentzeko eginahalean ibili izana leporatu dio NaBairi, eta «oraino, horren gibeletik dabilela», dio. «Bertze behin koalizio horrek batere interes sozialik gabeko proiektu honetan duen konpromisoa» kritikatu du. «Elizondoko plazako eraikinean gastatu zituzten 800.000 euroak ikusirik, interesik gabeko proiektuetan duten konpromisoak dagoeneko ez gaitu batere harritzen», adierazi du plataformak, eta «egitasmo espekulatzailea gelditzeko» eskatu du.
NABAI-K ALKATETZARI
«Administrazioaren isiltasun hori espediente honekin bakarrik pasatu ote den edo gehiagotan gertatu ote den jakin nahi dugu»
NaBai
NABAI-RI KRITIKA
«Espekulatzailea da Baztanen dagoen lurzoru urbanizagarri guztiarekin 40 hektarea gehiago urbanizagarri kalifikatzea eta bizitzen %38 hutsik edo ia erabili gabe egonik 252 bizitzako proiektua baimentzea»
Aroztegia eta gero zer?