Baztango Rugby Taldeak aurredenboraldiari ekinen dio ortziral honetan, abuztuaren 25ean. Baztango taldea lehendabiziko maila nazionalean ari da, B multzoan (Nafarroa, Aragoi, Errioxa, Gipuzkoa, Bizkaia, Araba eta Kantabria). Taldeak berrikuntza aunitz izanen du aurten. Aipagarria da Jean Bordagarray ipar euskaldunaren etorrera, entrenatzaile eta zuzendari tekniko lanean aritzeko. Datozen 4-5 urtetarako proiektua landuko du Bordagarray-ek eta kategoria guzietako taldeei lan-ildo bateratuak ezarriko dizkie. Modu berean, azpimarratu beharrekoa da bigarren lerroko Iñaki Ezkurra jokalariaren itzulera, gan den denboraldian Ohorezko Mailako Ordizia taldean jokatu ondotik.
Gainera, aurten nesken talde berria sortu da eta talde berri honetan, nazioartean hainbat partida jokatu dituen Agurtzane Obregozo lekaroztarra arituko da, Kanadan irailean jolastuko den nesken Munduko errugbi txapelketan jokatu ondotik.
Nazional mailako mutilen taldearekin eta nesken taldearekin batera, erregionaleko mutilen taldea eta jubenilen mutilen taldea ere zelairatuko ditu aurten Baztan Rugby Taldeak.