Berako Ricardo Baroja eskolaren 40. urteurrena dela eta egiten ari diren jardueren artean, oraingoan, argazki erakusketa bat antolatu dute. Ricardo Baroja eskola: 40 urte argazkitan erakusketa hau, kultur etxean egonen da publikoari irekita, gaurtik hasita hiru asteburutan. Ortziraletan 17:00etatik 19:00etara eta larunbatetan eta igandetan 11:00etatik 13:00etara eta 17:00etatik 19:00etara izanen da ikusteko aukera.
Berako Labiaga Ikastolako ikasleek erakusketa irekiko dute larunbat honetan Altzate karrikako ikastolako Areto Nagusian. Ekainaren 20a bitarte larunbat eta igandetan izanen da aukera erakusketa bisitatzeko, 16:00etatik 20:00etara. Urtean zehar egin dituzten lanak jarri dituzte Areto Nagusian, ikasle bakoitzeko lan bana.
Nafar Lansarek antolatuta, ekainaren 14tik 18ra bitarte, oinarrizko gaitasun digitalak lantzeko 25 orduko ikastaroa izanen dute Zubietan. 16 urtetik 65 urte bitartekoei bideraturikoa izanen da. Parte-hartzaileak goizetan, 09:00etatik 14:00etara bilduko dira eskolan.