Igandean 16:30ean Harriondoa Kultur Etxean Tantirumairu ikastolako eta Irain eskola publikoko Guraso Elkarteek, Lesakako Udalaren laguntzarekin antolatuta, ikasturte honetan ere Zinema euskaraz eskaintzen ari dira igande arratsaldetan Harriondoa Kultur Etxean. Otsailaren 2an, igandean 16:30ean Ballerina eskainiko dute. Sarrera 2 euro gostako da eta merienda ere eskainiko dute bertan.
Hodei Magoak ‘Ezinezkoaren logika’ eskainiko du igandean 18:00etan Kultur Etxean Hodei magoak Ezinezkoaren logika magia ikuskizuna eskainiko du euskaraz otsailaren 2an, igandean 18:00etan Berako kultur etxean. Berako Kultur Batzordeak antolatutako emanaldirako sarrera sei euro ordaindu beharko da.
Aitzinetik, ilbeltzaren 31n Etxarrin, Larraunen eta Iturmendin eta otsailaren 1ean Erron eginen dituzte lehen saioak Bardoak, Nafarroako taldekako bertso ekimena asteburu honetan abiatuko da, bosgarrenez. Txapelketa urtarrilaren 31n abiatuko da Etxarrin, Larraunen eta Iturmendin eginen diren saioekin. Eskualdeko lehen saioa otsailaren 2an, igandean, 18:00etan eginen dute Berako Kataku ostatuan. Berako Lamixene taldea (Ainhoa Larretxea, Aitor Elexpuru, Ekhiñe Zapiain, Estitxu Uranga, Julen Zelaieta eta Patxi Castillo) eta Auritz-Hendaia-Lesakako Amortziaren eliobak (Aimar Karrika, Josu Txoperena, Kristiñe Txoperena eta Maddi Ane Txoperena) izanen dira aurrez aurre.
Aranoko inauteriak hizpide hartuz, Maisuenean tertulia eginen dute datorren igandean, otsailaren 2an. Bertaratzen direnek argazki zahar, eta bideoen bidez oroitzapenak freskatzeko aukera izanen dute. 18:30ean hasiko dute hizketaldia eta bertaratzeko gonbidapena luzatu dute.
Igandean 19:00etan Arizkunenea Kultur Etxean izanen da Ibai Iturria mendizale beratarra Itxusi argazki elkarteak antolatuta, Ibai Iturria beratarraren eskutik, Aurrepirinioetatik Europako gailurrera bideo emanaldia izanen dute otsailaren 2an, lehendabiziko igandean, Elizondon. Arizkunenea kultur etxean zehaztu dute hitzordua eta, iluntzean, 19:00 aldera, bilduko dira.
Zortzi hilabete bitarteko haurrentzat eta haien gurasoentzat edo zaintzaileentzat masaje tailerra antolatu dute Leitzan. Denera lau saio izanen dira, urtarrilaren 14an eta 21ean eta otsailaren 4an eta 18an. Tailerra dohainik izanen da, Udaletxeko lehenengo solairuan, 11:00etatik 12:00etara. Parte hartu nahi duenak urtarrilaren 13a baino lehenago deitu beharko du 948 51 08 40 telefonora.
Joan den urtean zuen arrakastaren harira, aurten ere Nafar Lansarek 30 orduko informatika ikastaroa antolatu du. Urtarrilaren 14tik martxoaren 3ra eskainiko da, astearte eta ostegunetan, 17:00etatik 19:00etara, eskolako informatika gelan.