Xareta Egunaren lehenbiziko edizioa ospatu zen irailaren 16an, igandean Urdazubin. Mugen arteko herriak sustatzeko eginahala egin dute ospakizun berri honekin; Urdazubi eta Zugarramurdi Nafarroan eta Sara eta Ainhoa Lapurdin. Urdazubiko lehen edizioaren ondotik, urtero 4 herrien artean aldatzen joateko asmoa dute.
Egun horren aitzakian, Urdazubi eta Ainhoa lotzen dituen bide turistikoaren inaugurazioa egin zuten. Ekitaldian, zinta mozten izan ziren lau herrietako allkateak: Santiago Villares (Urdazubi), Henry Dagerre (Ainhoa), Jean Battite Laborde (Sara) eta Laxaro Dainziart (Zugarramurdi). Lehendik ere, Ainhoa eta Urdazubiko bizilagunek erabiltzen zuten bidaxka hau, baina orain egokitu eta euskal zalditxoekin seinalizatu dute. Bidearen hasmenta adierazten duen mugarria, Urdazubiko Genaro Fagoaga eskulangileak egin du bertako harri gorrian.
Bien bitartean, Urdazubiko plazan eskulangileek beraien lanak erakutsi eta saltzen saiatu ziren eta inguruan, Zugarramurdiko Txomin Amorenak eta bere koadrillak zikiroa prestatu zuen.
Arratsaldean, berriz, abuztuaren 4an hasitako Pilotaren Unibertsoa ekimenari akitu zen, lau pilota modalitateren erakustaldiarekin. Egun osoan musika doinuak nagusitu ziren, akordeoilarien eskutik.