Izan ere, Foruzaingoaren lehen idatzian, 64 urteko langilearen heriotza naturala izan zitekeela aipatzen bazen ere, forentsearen txostenak aukera hori baztertu du eta lan istripua izan dela dio, sindikatuek aipatu dutenaren arabera. Gainera, ez zen altueratik erori. Lan istripua izan dela jakinda, 24 orduko greba deitzea erabaki du Zalaingo langileen batzordeak urriaren 3rako. Condesa taldeko bertze lantegietan ere mobilizazioak iragarri dituzte.
Idatzia
LAB eta UGTko launa ordezkari, ELAko hiru eta CCOOko bi dituen Zalaingo langileen komitearen izenean Mikel Agirre presidenteak irakurritako idatziak dioenez, «lehendabizikoz, enpresako komiteak eta langile guztiok, gertatutako ezbehar larriaren aurrean, Agustinen lagun eta senideei elkartasuna adierazi nahi diegu». Komitearen ustez, «segurtasun gabezi baten ondorioz gertatutako istripuak agerian uzten ditu konpondu beharreko hutsuneak segurtasun arloan. Gaur egun, industrian, eguneroko kontua da segurtasun eskasia prekarietatearen ondorioz eta horrek eragindako istripuak. Hau dena egoera tamalgarri baten adierazlea da».
Langileen Komiteari garrantziskoa iruditzen zaio aipamen hauek egitea, «Zalain enpresak, urtetan, langileon segurtasunarekin izan duen eta baduen inplikazio falta nabarmena da eta. Eta beraz, arlo horretan aldaketa bat ematea ezin bertzekoa da, asteazkenean gertatutakoa berriro gertatu ez dadin».