Maiatzaren 6an, ostiralean Julio Soto eta Xabier Legarreta bertsolariek emango diete hasiera festei 20:30ean, Zubiondo tabernako bertso saioarekin. Gauean 22:30ean Mus txapelketa jokatuko da taberna berean. Bikote txapeldunak arkumea eramango du etxera eta azpitxapeldunak txakolina eta bi bogabante.
Larunbatean, maiatzak 7, 09:45ean krosean izen ematea irekiko da. 10:30ean abiatuko da haurren krosa eta 11:00etan helduen krosa. 12:00etan festei hasiera ofiziala emateko txupinazoa botako da eta ondoren kroseko sari banaketa eginen dute. Dragoia aterako da giroa alaitzera, trikitilariekin batera. 14:30ean herri bazkaria izango da Goiko Frontoian. Bazkaltzera joan nahi dutenek txartelak salgai dituzte Amaia kafetegian.
Arratsaldeko 6etan Papo kubanoarekin zunba eta ondoren Garazi eta Janire trikitilariak arduratuko dira giroa alaitzeaz. Gauerdiko 12etan hasita kontzertuak izango dira Desperdicio eta Oso Basatis taldeekin.