2003ko martxoaren 1ean egin zuen debuta Olazarrek Euskalen. Larrearekin batera 35-29 irabazi zien Uterga eta berekin batera debutatu zuen Migel Mari Urrutia saldiastarrari. Geroztik, binakako bi final jokatu ditu Koteto Ezkurra osabarekin batera, baina biak galdu egin ditu: «Lehenbizikoa Zeberio II eta Auzmendiren kontra galdu genuen eta bigarrena Urriza eta Barrenetxea IV.aren kontra. Bien artean urte batzuk pasatu ziren», aipatu du Olazarrek. Beharbada horiek dira bere oroitzapenik onenak, baina aldi berean, txapeletik hain hurbil egon eta ezin irabazi, hori da gelditu zaion arantzatxoa. «Bertze txapelketa ttikiago batzuk irabazi ditut, baina pena da ofiziala ez lortu izana», dio.
Doneztebeko lau erremontelarik jokatuko dute agurreko partidan, nahiz eta hasiera batean, afizionatutik hasita bere ibilbide beretsua egin duen Agirrezabalarekin aritzekoa zen. «Hori ezinezkoa izan da eta azkenean Doneztebeko lau erremontelari ariko gara eta hori ere aski berezia da. Larunbateko despedidan nere familia eta lagun guztiak izanen dira, momentu hunkigarria izanen da. Partidaren ondotik herrian afalduko dugu», onartu digu Olazarrek.