Nafarroako Bertsolari Txapelketa 2015

Kotte Plaza, Mikel Lasarte eta Sarai Robles Nafarroako Bertsolari Txapelketako final-laurdenetarako sailkatu dira

TTIPI-TTAPA 2014ko abe. 15a, 12:41
Kotte Plazak lortu zuen puntuaziorik altuena eta final laurdenetarako sailkatu da, Lasarte eta Roblesekin batera. Nafarroako Bertsozale Elkartea

Kotte Plaza iruritarrak lortu zuen puntuaziorik onena

Abenduaren 12an abiatu zen 2015 Nafarroako Bertsolari Txapelketa, Iruñean jokatu zen kanporaketarekin. Sei bertsolari izan ziren oholtzan, eta horietatik hiruk lortu zuten otsailean abiatuko diren final-laurdenetarako sailkatzea: Kotte Plaza, Mikel Lasarte eta Sarai Robles. Bertsozaleek Alegria Peñako aretoa bete zuten ortziral arratsean.

Abenduaren 12an abiatu zen 2015 Nafarroako Bertsolari Txapelketa, Iruñean jokatu zen kanporaketarekin. Sei bertsolari izan ziren oholtzan, eta horietatik hiruk lortu zuten otsailean abiatuko diren final-laurdenetarako sailkatzea: Kotte Plaza, Mikel Lasarte eta Sarai Robles. Bertsozaleek Alegria Peñako aretoa bete zuten ortziral arratsean.

Nafarroako Bertsolari Txapelketan lehen aldiz izena eman duten sei bertsolariek final-laurdenetara sailkatzeko kanporaketa jokatu zuten ortziral iluntzean Iruñean. Sahats Aleman, Mikel Juaniz, Mintxo Astiz, Kotte Plaza, Sarai Robles eta Mikel Lasarte izan ziren oholtzan. Haiei adi Alegria Peñako aretoa bete zuten 75 bertsozale izan zituzten.

Maider Ansa gai-emailearen gidaritzapean, Txapelketako ohiko moldean aritu ziren bertsolariok, binaka zortziko handian eta txikian; eta kartzelakoan bakarka, puntu-erantzunetan eta gai bati bina bertso eginez. Hiru epaile izan ziren bertsolarien lana baloratzen: Arkaitz Goikoetxea, Nerea Bruño eta Ekintza Landa.

Kotte Plaza iruritarrak irabazi zuen saioa, puntuaziorik altuena lortuta. Bigarren eta hirugarren postuan, berriz, bi gazte barañaindar: Mikel Lasarte eta Sarai Robles, hurrenez hurren. Laugarren postuan Sahats Aleman izan zen, bosgarrenean Mikel Juaniz eta seigarrenean Mintxo Astiz.

Hortaz, Kotte Plaza, Mikel Lasarte eta Sarai Robles Nafarroako Txapelketako hurrengo faserako sailkatu dira. Kanporaketetan sailkatu diren hiru bertsolari hauekin batera, izena eman duten beste 27 bertsolariek hartuko dute parte final-laurdenetan, 30 bertsolari osotara.

Final-laurdenak otsailaren 7an hasiko dira eta 2015eko Nafarroako Bertsolari Txapelketa martxoaren 28an amaituko da.

Nafarroako Bertsolari Txapelketaren inguruko gainerako xehetasunak otsaila hasieran emango ditu Nafarroako Bertsozale Elkarteak.

Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.


Egin TTIPI-TTAPAren lagun