Nafarroako Gobernuak, Nafarroako 16 erakunderekin batera, horien artean Cederna-Garalur elkartea, Empléate proiektua paratu du abian. Ekimen honen xedea, beren enpresa ideiak eratzen eta abian paratzen zailtasuna handiena duten pertsonen izaera sustatzailea bultzatzea eta enpresak sortzen laguntzea da, horretarako beharrezkoa duten laguntza emanez.
Ekimena, Nafarroako Enplegu Zerbitzuak bultzatu du, eta Europar Batasuneko Equal ekimenaren barnean txertatzen da. Helburua enpresak sortzea da, metodo eta tresna berritzaileak diseinatuz eta garatuz, eta talde sustatzaileen premietara eta eskualdearen ezaugarrietara egokituko diren finantziazio formulak esperimentatuz.
Une honetan, dagoeneko abiatuak dira aurrikusitako hainbat jarduera eta, modu berean, eskaintzen dituen zerbitzu batzuk operatibo daude. Gure eskualdeari dagokionez, ideiak eta negozioak identifikatzeko tailerra eginen da apirilaren 5ean eta 7an Donezteben eta ekainaren 19 eta 21ean Elizondon.
Bertze aldetik, “Irten labirintotik” erakusketa herriz herri ikusgai izanen da Agoitzen, Elizondon, Altsasun eta Lekunberrin. Elizondon, Arizkunenea Kultur Etxean izanen da, maiatzaren 16tik 19ra, asteartetik ortziralera, 18:00etatik 21:00etara. Leitzaldean interesaturik daudenak, Lekunberriko erakusketa bisitatu dezakete maiatzaren 30etik ekainaren 2ra, asteartetik ostiralera, 10:00etatik 13:00etara eta 16:00etatik 20:00etara, Mitxausenea Kultur Etxean.
Beren enpresa propioa sortu nahian dabiltzan pertsonek, negozio ideiaren bat garbi eduki edo ez, norbanakoari zuzendutako doako prestakuntza eta baliabideak jaso ditzakete, bakoitzak duen ideia abian paratzen laguntzeko. Horretarako harremanean jar daitezke Izaskun Abrilekin, Baztan, Urdazubi eta Zugarramurdiko Tokiko Garapen Eragilearekin, 606 408613 edo 948 580561 telefonoetara deituz, baita Arantxa Arregirekin ere, Bertizana, Malerreka eta Bortzirietako Tokiko Garapen Agentearekin, 606 431357 edo 948 625122 telefonoetara deituz.Empléate proiektuak honako taldeak hartzen ditu bere barnean: lan merkatuan txertatu nahi duten 30 urtez goitiko emakumeak, ezkutuko ekonomian ari diren 30 urtez goitiko emakumeak, lan egonkorrik gabe dauden edo mugitzeko aukerarik ez duten emakumeak, etorkinak, ijitoak, gazteak edo egoera ahulean dauden taldeak, alegia, langabezian denbora luzea daramaten pertsonak, bazterkeria sufritzeko egoeran eta langabezian dauden pertsonak eta gisakoak.