Euskal Herria Mendi Erronka mendi lasterketa maiatzaren 31n egin da Leitzan. Euskal Selekzioaren Aldeko Iritzi Taldeak leitzarren laguntzaz antolatu du. 65 kilometroko luzeran eta 7.000 metroko gainbehera duen proba bukatzen bizkorrena Amezketako Iker Karrera izan da (6:34:39).
Hain zuzen, zazpi ordu baino guttiago behar izan dituen kirolari bakarra izan da Amezketakoa. Orozkoko Javi Olabarria izan da bigarren (7:00:54) eta Zumaiako Pedro Etxeberria hirugarren (7:07:09). Lehenbiziko leitzarra Oskar Ariztimuño izan da, 28. sailkapen orokorrean (07:59:21).
Lehenbiziko emakumea, berriz, Errenteriako Leire Fernandez Abete izan da, 33. sailkapen osoan (08:02:36).
Leitzatik abiatuta, Guratz, Gorriti, Arribe, Gaintza, Hirumugarrieta (1.431 metro), Albi, Artxueta, Lekunberri, Etxarri, Ireber eta Kornieta igaro behar izan zuten kirolariek.
Parte hartzaile kopuruak ere gorantz egin du aurten, 700 dortsaleko muga jarri eta guztiak bete baitziren. Horietatik 442k lortu zuten proba burutzea.