erran.eus

'Espiello' etnografia-dokumentaleko zinemaldirako hautatu dute Jon Abrilen Neskatoak

  Kultura  Bortziriak  Bera

Sobrarbeko (Huesca, Espainia) Jaialdira aurkeztutako ia 400 lanen artetik aukeratutako 23en artean dago beratarraren lana

Huescako (Espainia) Sobrarbe eskualdean egiten den Espiello etnografia-dokumentaleko zinemaldirako hautatu dute Jon Abril beratarren Neskatoak dokumentala. Jaialdira mundu osoko ia 400 lan aurkeztu dira, eta Abrilen lana aukeratutako 23en artean dago.

'Espiello' etnografia-dokumentaleko zinemaldirako hautatu dute Jon Abrilen Neskatoak
Baztan-Bidasoaldeko 15 emakumeren testigantzak ere biltzen ditu dokumentalak. | Ikusi handiago | Argazki originala

 

Espiello (ispilua, aragoieraz) etnografia-dokumentalean espezializatutako zinemaldia da, eta aurten XV. aldia izanen du. Martxoaren 24tik apirilaren 1era eginen da Aragoiko Pirinioan dagoen Boltaña herrian, Sobrarbe eskualdean. Neskatoak lana martxoaren 28an emanen da, 22:00etan, herriko Kongresu-aretoan.

Abrilen lana sari nagusietan lehiatuko da, eta baita Pirinioetako sortzaileen arteko lanik onenera ere.

 

Neskatoak dokumentala

Joan zen martxoaren 6an estreinatu zenetik, Euskal Herriko 50 herritan baino gehiagotan aurkeztu da dokumentala. 1940 eta 1970 urteen artean Ipar Euskal Herrira eta Frantziako bertze hainbat tokitara lanera joandako emakumeen bizipenak jasotzen ditu “Neskatoak” dokumentalak. Frankismoaren urterik gogorrenetan, familia gibelean utzi, eta bizimodu hobe baten bila joan ziren emakume horiek, nerabe eta neska gazteak. Baldintza gogorretan aritu behar izan zuten, 12 eta 14 orduko lan-jardunetan; anitzetan kontraturik eta paperik gabe; pasaporterik gabe, muga gordeka pasa behar izan zuten hainbertzek, gaur egun gurera bizimodu hobe baten bila etortzen diren etorkin eta errefuxiatuen gisan. Baztan-Bidasoaldeko 15 emakumeren bizipenak biltzen ditu dokumentalak.  

Zuzendaria: Jon Abril Olaetxea (Bera, 1975) kazetaria da ikasketaz, kultur kudeaketan aditua, eta gaur egun Elhuyarren dabil lanean, partaidetza teknikari moduan. Hainbat hedabidetan lanean eta kolaboratzaile lanetan jardun ondotik, hau du bere lehenbiziko dokumentala zuzendari moduan.

 

Hurrengo emanaldiak:

Emakumeen egunaren inguruan:

Martxoak 3, ortziralea, Abadiño

Martxoak 5, igandea, Bergara

Martxoak 6, astelehena, Anoeta

Martxoak 10, ortziralea, Burlata

Martxoak 14, asteazkena, Arrigorriaga

Martxoak 28, asteartea, Boltaña (Sobrarbe, Huesca, Espainia)

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa