Abenduaren 10ean, larunbatean 12:00etan jokatuko dira Berako Xugan lehen fase irekiko lehen bi kanporaketak. Ofizio bana zortziko haundian, ttikian edo hamarreko ttikian zozketaz, puntu bana eta hitza, objetua edo kanta zozketaz kantatuko dute. 14:00etan bazkaria eginen dute Xugan bertan eta bazkalondoan, 15:00etan bertze banakako bi kanporaketa jokatuko dituzte lan berarekin.
Bortzirietako eta Baztan-Malerrekako bertsolariez gain, Bilbo eta Zumarraga-Urretxuko Bertsotrukeko sei bat bertsolarik ere parte hartzekotan dira, eta parte hartu nahi duen guziarendako irekia egonen da.
Sailkatzen diren lehen hamabi bertsolariekin, suge sistemarekin hiru laguneko lau taldetan banatu eta Lesakara joanen dira finalerdiak jokatzera. Lehenbizikoa Zialdon jokatuko dute (1-8-9, 3-6-11ren kontra) eta bigarrena Haizeguan (2-7-10, 4-5-12ren kontra).
Finalerdietan nagusitzen diren bi hirukoteek finala Arranon jokatuko dute. 21:00etan afaria eginen da eta ondotik finala. Afarirako txartelak 15 eurotan eros daitezke. Izena emateko bortzibertso@gmail.com helbide elektronikora idatzi edo 618963011 telefonora deitu behar da.