ALCER elkarteak eman zien saria emaileei eta ebakuntzak posible egiten dituzten profesionalei
Giltzurrunetako eritasunak dituzten pertsonak biltzen ditu ALCER elkarteak. Bigarren urtez, bizirik daudela giltzurruna ematen duten emaileak saritu nahi izan ditu elkarteak. Martin Antzizar lesakarra da horietako bat. Lesakarrarekin batera, Maria Jose Casanova giltzurrun-emailea eta ebakuntzak posible egiten dituzten profesionalak ere saritu zituzten azaroaren 17an Iruñean egindako galan.
Martin Antzizarren kasuan, bizirik dagoela emandako giltzurrunari esker, Esperanza arrebak ez zuen dialisirik egin beharrik izan. Urte eta erdi pasatu da orduz geroztik eta oraindik esker oneko solasak ditu atenditu zuten lan-taldearentzako: «Medikua eta erizainek lan bikaina egin zuten eta arreta zerbitzua ere hagitz ona da, ederki zaindu gaituzte». ALCER elkarteak egiten duen lana ere goraipatu zuen.