Presidentearen Kopari dagokionez, krisiaren eraginez zenbait urtez jokatu gabe egon ondotik aurten antolatu dute berriz. Fagoagak emaitza ona lortu zuen. Konpetizioan 75 plateretik 67 hautsi zituen (berak duen Espainiako errekorretik 3 platerera). Finalerdian 16 platererik 12 hautsi zuten eta Madrilgo Pilar Calvoren kontrako buruz buruko finalean 16tik 13 hautsi zituen (madrildarrak baino 2 gehiago), Presidentearen Kopa irabazteko.
Larunbat honetan Granadan jokatu den Espainiako txapelketan markak ez dira hain onak izan. Eguraldiak ere ez zuen hainbertze lagundu, eguzkiak aunitz berotzen baitzuen eta horretaz gain, haize zalarra zebilelako. Lehenbiziko bi serietan nonbait hor, 25etik 20 eta 25etik 22 plater hautsi zituen lesakarrak. Hirugarrenean, ordea, bertze partehartzaile guziak bezala, okerrago ibili zen. Finalerdian 16tik 9 plater hautsi eta lortu zuen finalean sartzea. Berriz ere Pilar Calvo madrildarraren kontra jokatu zuen finalan 16tik 10 hautsi eta bederatzigarren aldiz Espainiako txapelketa irabaztea lortu zuen.
Hain zuzen, 2006an lortu zuen Itsaso Fagoagak Espainiako lehen txapela, Ione ahizpari lehen aldiz irabazita. 2011n eta 2014an ez zuen parte hartzerik izan, baina geroztik, jokatu dituen txapelketa guztiak irabazi ditu. Urte guzti hauetan lagundu dioten familia, lagun, bikote eta babesleak eskertu nahi izan ditu.