Programa honen barrenean, Aste Santuko oporraldirako bertze eskaintza izanen dute Bortzirietako haurrek. Izan ere, haur-parke bat paratuko da Irain eskolako pilotalekuan apirilaren 8 eta 9ko asteburuan eta Ortzegun Santutik aitzinera, apirilaren 13tik 22a arte, biak barne. Haur ttikienentzat txirrista-gunea, Altxorraren Uhartea, Ludoteka eta Piloten etxea izanen da eta koxkorragoentzat, Oihana, Futbol-ate puzgarria, eskalatzeko gune puzgarria, bi ping-pong mahai, bi futbol-mahai eta pintura tailerrak. Haur-parkea zabalik izanen da 16:00etatik 20:30etara eta prezioei dagokienez, arratsalde baterako 3 euro ordaindu beharko da; hamabi egunetarako txartela 25 euro eta hamabi egunetarako familia osoarentzat txartela 30 euro. Txartelak lortzeko, 012ra deitu eta han emanen dute informazio guzia.