erran.eus

Bertizko Parke Naturalak “Tripadvisor” webgunearen bikaintasunaren ziurtagiria lortu du

  Gizartea  Bertizarana

Nafarroako bertze 20 toki eta eskaintza turistikok ere lortua dute ziurtagiria, Urdazubiko eta Zugarramurdiko leizeek erraterako, baita 47 ostatu eta 58 jatetxek ere

Bertizko Parke Naturalak lehen aldiz lortu du bidaien iritziei buruzko “Tripadvisor” webguneak emandako bikaintasunaren ziurtagiria. Nafarroako bertze 20 toki eta eskaintza turistikok ere lortua dute ziurtagiria, baita 47 ostatu eta 58 jatetxek ere. 

Bertizko Parke Naturalak “Tripadvisor” webgunearen bikaintasunaren ziurtagiria lortu du
Bertizko Natur Parkeko jauregia. | Ikusi handiago | Argazki originala

 

“Tripadvisor” webguneak urte osoan sareko erabiltzaileen aldeko iritziak jasotzen dituzten munduko baliabide turistikoei ematen die saria. Bertizek 5etik 4,5 puntu lortu ditu.

Bertizko Parke Naturala Oieregin (Bertizarana) herrian dago, eta 20.000 hektareako baino gehiagoko baso atlantikoa da. Iparraldean, Etxalar du eta, ekialdean, Baztan. Basoak XIV. mendean du jatorria. Azken jabeak, Pedro Cigak, Nafarroako Gobernuari dohaintzan eman zion lursaila 1949an, eta gobernuak parke natural izendatu zuen. Sarreran 100 urte baino gehiago dituen lorategi botanikoa dago, zuhaitzen eta zuhaixken 120 espezie dituena.

Ziurtagiria lortua duten gainerako 20 toki eta eskaintza turistikoetatik 9 Iruñean daude (katedrala, udaletxea, harresiak, Entzierroaren Monumentua, Estafetako balkoiak, Yamaguchi parkea, Gaztelu plaza, taconerako Lorategiak eta hiribururko eskaintza gastronomikoa). Gainontzekoak Foru Komunitatean zehar daude: Errege Bardeak, Orreagako kolegiata, Urdazubiko Leizeak, Zugarramurdiko leizea, Irunberriko Arroila, Leyreko Monasterioa, Xabierko Gazteluko Museoa, Urederra ibaiaren iturburua, Erriberriko Jauregia, Urbasa-Andia Natur Parkea eta Iratiko Oihana. 

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa