Hiru herriz osatutako bailarak, Narbarte, Legasa eta Oieregi, bere izena Bertizaranako jaurerritik hartzen du. Gaur egun hiru kontzejuz osaturik dago eta bailarako alkatea Antonio Erregerena (Bildu-koa) da.
Bere lur eremua 40 kilometro koadrokoa da eta itsasotik 136 metrotara dago. Bertizaranako biztanle kopurua, berriz, 647koa da. Azken hiru hamarkadatan biztanleria mantentzen ari dela erran daiteke, baina hala ere, joera hori beheitiranzkoa da.
INE Estatistika Institutu Nazionalaren zentsoko datuei erreparatuz gero, 1920 izan zen biztanle kopururik altuena, 936 bizilagunekin eta exkaxena 1981ean, 607 biztanlerekin. Ondoko taulan 1900az geroztik biztanleriak izan duen bilakaera ikus daiteke.