Eskualdean zein Euskal Herriko bertze tokietan ugaritzen ari dira azken aldian pintadak. Eskualdeari dagokionean, azkenak Legasan egindakoak izan dira.
Urtean zehar antolatzen dituen gastuei aitzin egiteko, Malerrekako Gazte Asanbladak txosna paratu zuen Legasan, San Agustin besten atarian. Bada, bestak hasi baino lehenago, abuztuaren 22ko arratsean, pintadekin azaldu zen txosna. Norbait barrenean sartu eta pintura gorriz hainbat idatzi egin zituen.
Diana edo gurutzea marrazteaz gain, esaldi hauek idatzi zituen: Hemen ez, alde hemendik, puta semeak eta Juan debalde se murio. Txosnako pegatina eta kartelak gorriz pintatu zituen eta zaborra ere sartu zuen barrenera.
Gazte Asanbladak gertaera salatu, eta «pintadak egin zituztenei eta berdin pentsatzen dutenei» mezu argia luzatu die: «ez gaitu ezerk geldituko. Bide onean goazela badakigu, herria gurekin dago eta honek edozein erasori aurre egiteko indarra ematen digu». Gaineratu duenez, «gure herrien alde elkarrekin lan egin eta eskubide urraketa guztiak borrokatzen jarraituko dugu, Malerreka eta Nafarroaren alde lan egiten, Euskal Herri berri baten bidean lan egiten».